“Барилга.МН” сэтгүүлийн эрхлэгч асан, Барилгын материалын технологич, Монгол Улсын Зөвлөх инженер, яруу найрагч Ч.Баатарсүрэн  одоогоос нэг жилийн өмнө буюу 2016 оны есдүгээр сарын 29-ний өдөр  бурхны орноо одсон  юм.

Ч.Баатарсүрэн 1970 оноос Барилгын яаманд мэргэжилтэн, Барилгын техникумд багш, Ханын материалын комбинатад ерөнхий инженер, Дэд бүтцийн яаманд  Барилгын материалын үйлдвэрийг удирдах газрын дэд дарга, Барилга, хот байгуулалтын яаманд ахлах мэргэжилтэн, Барилгын материал үйлдвэрлэгчдийн холбооны дэд ерөнхийлөгч, “Барилга.МН” сэтгүүлийн эрхлэгчээр тус тус ажиллаж байсан, Монгол Улсын бүтээн байгуулалтын их үйлсийн нэр хүндтэй ажилтан, салбартаа хүлээн зөвшөөрөгдсөн зүтгэлтэн байлаа.

Монголын зохиолчдын эвлэлийн  гишүүн, яруу найрагч тэрбээр "Нутгийн салхи", "Миний орчлон", “Домог амилах цаг”, “Барилгаар нэрээ мөнхөлсөн хүн”, "Гэгээн сэтгэл" зэрэг 14 ном хэвлүүлжээ.

       “Барилга.МН” сэтгүүлийн хамт олон эрхэм эрхлэгч, тулхтай, туршлагатай ахынхаа дурсгалыг хүндэтгэн түүний “Насны минь өчил” хэмээх шүлгийг уншигч олонтойгоо хуваалцаж  байна.

Насны минь өчил

Алдрайхан бага нас минь
Аав, ижийн минь зүрх сэтгэлд л үлдсэн байх
Өлгийтэйгээс минь эхлээд намайг
Өхөөрдлийн эзэн болгосон бага нас минь
Намайг орхиод удаж байна
Нуугдсан газрыг нь олохгүй байна
Орхигдсон цаг хугацаагаа би
Огтхон ч төсөөлж чадахгүй байна
Эрх танхилхан хүүхэд нас минь
Ижий, аавынхаа хайрын өлгийтэйгээ
Их л алсад үлдсэн байна.
 
Залуу идэр насаа би
Замын хаана, хэзээ орхисноо
Эргэцүүлж бодоод бас л санахгүй байна
Эр чадал тэгширсэн гал цогтой нас минь
Надад дурлаж явсан сайхан бүсгүйчүүдийн
Нандин зүрхэнд дурсамж болж үлдсэн байх
Насны минь ганцхан ханийн минь сэтгэлд
Нарлаг өдрийн гэрэл гэгээ болж яваа байх
Барьсан барилгуудын минь хана, дээврийн
Бат тулгуур, суурь, багана нь болж хоцорсон байх
Бишрэх, хайрлах, эх орноо дээдлэх,
Байгуулж бүтээх үйлсэд бие, сэтгэлээ зориулсаны
Бахархал, ялалт болж дурсагдах байх.
 
Өнөөдөр надтай хөтлөлцөж яваа
Өвгөн нас минь хэлж байна:
Хаана, хэзээ ч би чамайг орхихгүй
Хамтдаа л хүний хорвоогоос халина.