Цаг агаар, орчны нөлөөллөөс бүрэн шалтгаалж байдаг барилгын салбарын ид ажил хүйтний улиралтай зэрэгцэн намждаг энэ үед “БАРИЛГА.МН” сэтгүүл шинэ дугаараа уншигчдынхаа гарт хүргэж байна. Улирал, цаг үетэйгээ нийцүүлэн барилгын инженер, техникчид, барилгачдадаа зориулан намрын дугаарынхаа нийтлэл, зөвлөгөө мэдээллийг тусгайлан бэлтгэлээ.

  Мэргэжлийнхэнд зориулсан мэдээллээс онцолбол, евро стандарт ба евро кодыг барилгын салбарт нэвтрүүлж буй явц, элс, хайрга, дайрганы стандартын ялгаа болон тайлбарууд, хүйтний улиралд үргэлжлүүлэх бетоны хэрэглээ, мөн бидний тэр бүр ялгаж таниж чаддаггүй цементийн савалгаан дээрх хаяг шошгын тайлбар, барилгын материалын үнэ ханш, ажил гүйцэтгэлийн үнэлгээг нэрлэж болно.






  Мөн “мэргэжлийн бус” бусдын нүдээр барилгын салбарын тухай бодол, саналуудыг сонсож, уншигчдадаа хүргэхийг зорьж, “Харах өнцөг” буландаа бэлтгэсэн тодруулгууд, Дурсгалт барилга булангийн “Хамгаалж чаддаггүй хамгаалалтын бүсүүд”, Нэг сэдвээр булангийн “Хийн хангамжтай сууцанд хэн хүнгүй орохсон” нийтлэл манай салбарт удирдах ажил болон бизнес эрхэлдэг эрхмүүдэд нэгийг бодогдуулж, хоёрыг тунгаалгах биз ээ.



  Түүнчлэн сар бүр сэтгүүлийн маань хойморт залагддаг Дугаарын зочноор үндэсний томоохон үйлдвэрүүдийг тогтвортой, амжилттай ажиллуулж яваа “Пирамид индастри” ХХК-ийн захирал Т.Түмэнбаатарыг урьж, сонирхолтой ярилцлагыг өрнүүллээ. Түүний ярианаас үйлдвэрлэгч хүнд тулгардаг бэрхшээлийг хэрхэн давж, боломжийг алдалгүй яаж ашиглах гээд сургамж болохуйц үнэтэй зөвлөмжүүдээс нь сонирхоорой.



  “БАРИЛГА.МН” сэтгүүлийн зүгээс барилгын мэргэжлийн багш судлаачид, оюутан залуустай хэзээд нээлттэйгээр хамтран ажилладаг билээ. Энэ удаад ШУТИС-ийн Барилга, архитектурын сургуулийн оюутнууд дадлагын ажлаараа туршиж хийсэн Элсэн байшингийн технологийг онцлон танилцуулж байна. Хөдөө орон нутагт нутагшуулах боломжтой, хямд төсөр зардалтай гээд олон давуу талыг нь тэдний судалгаа, туршилтаас аваарай.



  Манай сэтгүүлийг зорин уншиж, олон төрлийн мэдээлэл авч байдаг хэрэглэгчдээ ч бид мартаагүй. Тухайлбал, байр хайж буй иргэддээ зориулан Улаанбаатар хот дахь шинэ орон сууцны төслүүдийг дүүргээр нь ангилан гаргалаа. Мөн амины орон сууцтай иргэддээ Рейк модыг зөв сонгон хэрэглэх болон байшингийнхаа дулаалгыг хэрхэн хийх, хайртай нохойндоо чамин сууц хийх тухай зөвлөмжүүдийг хүргэж байна. Мөн таны нүдийг амрааж, сонорыг мялаах сонирхолтой гадаад мэдээг бэлтгэхээ мартаагүй шүү.

Сэтгүүлийн нүүр хавтас – “БАРИЛГА.МН” сэтгүүлтэй “Монцемент” ХХК хамтран ажиллалаа.

Дашрамд дуулгахад, “БАРИЛГА.МН” сэтгүүлийн IV улирлын захиалга орон даяар явагдаж байгаа тул та бүхэн сэтгүүлээ амжиж захиалаарай.