2017 онд хийж бүтээсэн ажлаа дүгнэн цэгнэж, шинэ календарийн хуудаснаа ирэх оны төлөвлөгөөгөө сийрүүлэн бичих хариуцлагатай мөч хаяанд ирлээ. Энэхүү шинэ оны босгон дээр “БАРИЛГА.МН” сэтгүүл ч мөн шинэхэн дугаараа уншигчдынхаа гарт хүргээд байна.

  Барилгын компаниуд, төрийн бус мэргэжлийн зарим холбоодын мэндчилгээг уламжлан дэвшүүлж буй энэ удаагийн дугаарт бүтээн байгуулагчид, барилгачдаа дэмжсэн, уншигчдадаа хэрэгтэй олон мэдээлэл, ярилцлага, нийтлэлүүдийг бэлтгэлээ.

Мэдээж сэтгүүлийн өвөрмөц өнгө төрхтэй нүүр хуудасны талаар тайлбарлавал,

  Хүүхдийн эрүүл мэнд, аюулгүй байдлыг эн тэргүүнд тавьж, тэдэнд зориулсан онцгой загваруудаар тавилга үйлдвэрлэдэг “Cilek” брэндийг танилцуулж байна. Энэ нь TSE EO гэрчилгээний дагуу хорт хавдар үүсгэгчгүй материал ашиглан EO стандартаар бүтээгдэхүүнээ үйлдвэрлэдэг учир уншигч, хэрэглэгчдэдээ зориулан онцлон хүргэж байгаа юм.

  Шинэ нисэх буудлын бүтээн байгуулалтад гар бие оролцож, өдгөө “Оюу Толгой”-н далд уурхайн байгууламжийг барих их ажилд ханцуй шамлан орсон “Премиум Конкрит” ХХК-ийн гүйцэтгэх захирал О.Батмөнхийг Дугаарын зочноор урьж ярилцсанаас онцолбол, “Бетон нь олон улсын хэмжээнд усны дараа тооцогддог, хамгийн өргөн хэрэглэгдэж байгаа бүтээгдэхүүн юм. Мэдээж манай улс хөгжиж байгаа орон учир бүтээн байгуулалтууд олноороо өрнөж, байшин барилгууд сүндэрлэсээр байна. Тиймээс цаашид бетоны эрэлт ч нэмэгдэнэ гэж өөдрөгөөр харж байна. Гэхдээ хамгийн гол асуудал нь үйлдвэрлэгч бид олон улсын зах зээлтэй хөл нийлүүлэн, технологийн хамгийн өндөр хөгжлийг шингээсэн, байгаль орчинд ээлтэй бетоныг нийлүүлэх нь чухал шүү.”



  Сэтгүүлийн зүгээс “EGS-Standard Consulting” ХХК-тай хамтран 11 дүгээр сарын 23-ны өдөр зохион байгуулсан “Барилгын хөөсөнцөр полистирол (EPS) үйлдвэрлэгчдэд тулгамдаж буй асуудал” сэдэвт уулзалт хэлэлцүүлэг зохион байгуулсан билээ. Уулзалтад хөндөгдсөн асуудал, дэвшүүлсэн шинэ санаачилга, үйлдвэрлэгчдийн ярьсан гол сэдвийг “Харах өнцөг” булангаас уншаарай.



  Мөн “Сэргээн засварлах ажлыг хэдий болтол мэргэжлийн бус хүмүүсээр хийлгэх вэ?” нийтлэлээр ахмад сэргээн засварлагч, Монгол улсын зөвлөх эдийн засагч Ц.Цэрэнжанцангийн асуудал хөндсөн санааг тусгасан билээ. Түүний нийтлэлдээ онцолсон “Монголын ард түмний олон үеийн урлан бүтээсэн үүрд мөнхийн, эрхэмсэг нандин өв болсон түүх, соёлын дурсгалуудаа чухам хэдий болтол мэргэжлийн бус хүмүүсээр ухуулж төнхүүлэн, сэргээн засварлаж байна хэмээн өөрсдийгөө хуурсаар байх вэ?” гэдэг асуулт төр, засгийн эрх мэдэлтнүүдээс хариугаа нэхсээр...

  Барилга барьж байгаа аж ахуйн нэгж, байгууллага, хувь хүмүүст барилгын материал, бараа үйлчилгээг маш дөт замаар хүргэж буй шинэлэг үйлчилгээг нэвтрүүлсэн “БАРИЛГАЧИН ГРУПП”-ийн үүсгэн байгуулагч, Гүйцэтгэх захирал Г.Батсүхтэй ярилцсаныг мөн хүргэж байна. Тэрээр ярилцлагадаа, “Барилгын материал авч байгаа худалдан авагчид, байшин барилга барьж буй иргэд чанартай бүтээгдэхүүн хаанаас авахаа тэр бүр сайн мэддэггүй. Гэтэл тааруухан материал авснаас болж барилга нь чанар муутай болох, барилгын ашиглалтын хугацаа богиносох гээд олон эрсдэл бий. Энэ эрсдэлийг бууруулахын тулд чанар сайтай барилгын материалуудыг нэг дороос, үйлдвэрийн үнээр авах боломжийг олгосон үйл ажиллагааг эхлүүлэх санаа төрсөн. Үндэсний үйлдвэрлэгчидтэйгээ зөвшилцөж, тэдэнтэйгээ хамтран ажилласаны үндсэн дээр энэ ажлыг эхлүүлээд байна.” гэсэн юм.



  Түүнчлэн амжилттай ажиллаж, салбартаа манлайлагч болсон нэгэн интерьер дизайнер залуугийн “Ажлын нэг өдөр” буланд саатаж, уран бүтээлийн халуухан ярианаас нь сонороо мялаагаарай. Мөн халаалтаа удирдангаа эрчим хүчээ хэмнэх боломжтой “Дэвшилтэт технологи”-той танилцаж, амьдрал ахуйдаа нэвтрүүлэх боломжийг судлаад үзээрэй.



  Барилгын салбарынханд хамгийн хэрэгтэй Бетон зуурмаг, бетон эдлэлийн үйлдвэрүүдийн нэрс, мэдээллийг Монголын барилгын материал үйлдвэрлэгчдийн холбооны нэгтгэн гаргаснаар хүргэж байна.

  Сар бүр тогтмол хүргэж буй “Туршилт, судалгаа” буландаа ШУТИС, БАС-ийн халаалт, агаар сэлгэлтийн мэргэжлийн оюутнуудын санаачилсан гэр хороололд зориулсан шинэлэг угаалтуурын талаар, мөн “Нарны халаалтыг оновчтой ашиглах боломж” судалгааны үр дүнг онцоллоо. Зөвхөн угаалтуур гэлтгүй, 21 дүгээр зууны хөгжлөөс хойш чангааж буй алдарт “жорлон”-г шинэчлэн сайжруулах хувилбаруудын талаар зөвхөн “БАРИЛГА.МН” сэтгүүлээс унших боломжтой шүү.





  Мөн байр авах гэж буй, байшин барихаар төлөвлөсөн иргэддээ зориулаад Шинэ орон сууцны үнэ ханш, Барилгын гол нэр төрлийн материалуудын үнэ, Ажил гүйцэтгэлийн үнэлгээ, Барилгачин группийн онцлох бүтээгдэхүүнүүдийг уламжлал ёсоор шинэчлэн хүргэж байна. Эцэст нь интерьерийн сонирхолтой шийдэлтэй танилцангаа, Хуулийн булангаас “Орон сууцны дундын эд хөрөнгийн өмчлөл, эзэмшил, ашиглалт ба сууц өмчлөгчийн эрх, үүрэг” сэдэвт хууль эрх зүйн мэдээллийг уншиж, үгийн сүлжээгээр оюуны алжаалаа тайлаарай.



  Дашрамд хэлэхэд, хэзээд таны ширээний үнэнч зөвлөх байдаг “БАРИЛГА.МН” сэтгүүлийн шинэ улирлын захиалга тун удахгүй эхлэх гэж буйг дуулгая.