Үвэ Фикеншер: Монгол нутаг бол нар, салхины эрчим хүчний шавхагдашгүй нөөц боломж юм

Batsuh

Үвэ Фикеншер: Монгол нутаг бол нар, салхины эрчим хүчний шавхагдашгүй нөөц боломж юм

“Нарны архитектур” гэхээр уншигч танд сонин, өвөрмөц санагдаж байна уу? Тийм ээ, яг энэ сонирхолтой сэдвийг хөндөн нарны гайхамшигтай, шавхагдашгүй нөөц баялгийг ашиглан эрчим хүч, дулааны асуудлаа бие даан шийдсэн “Нарны байшин” төслүүдийг амжилттай хэрэгжүүлсээр буй ХБНГУ-ын Хоф хотын архитектор, хот төлөвлөгч, эрчим хүчний зөвлөх Үвэ Фикеншерийг урьж ярилцлаа. Германы Бавари мужийн “BFZ” сургалтын төвийн шугамаар, Монголын Барилгын Зураг Төсөл Зохиогчдын холбоо болон Монголын Барилгын Үндэсний Ассоциацийн урилгаар манай улсад инженер, техникийн ажилтнуудад сургалт явуулахаар ирэхэд нь түүнтэй цөөн хором ярилцав.

Үвэ Фикеншер нь:

2009 - 2010 онд Герман улсын Баварийн Сибирь гэгдэх Хайэр Франкониа дүүрэг дэх анхны “Нарны байшин” төслийг ,
2010 - 2013 онд Германы дөрвөн өөр байршилд уг төслийг хэрэгжүүлсэн
2012 онд Хайэр Франкониа дүүрэгт хэрэгжүүлсэн анхны “Нарны байшин” төслөөрөө “Цагаан арслан” шагнал хүртсэн.
2013-2016 онд Байгалийн цэвэр материал, нарны эрчим хүчний ухагдахууныг ашиглан, оффис болон сууцыг хослуулан барьсан Ногоон эко барилга буюу “Нарны байшингийн дөрвөн төсөл хэрэгжүүлсэн
2015 онд Аппер Франкониагийн Барилгын эрчим хүчний шагнал хүртсэн
2016 онд “Нарны байшин” цэцэрлэгийн эко барилгын төслийг анхлан санаачилсан аж.

-Та хэдийнээс нарны эрчим хүчийг сонирхож, судалж эхэлсэн бэ? Яагаад?

- Ер нь энэ салбарыг оюутан байхаасаа маш их сонирхдог байсан. 2006 онд нарны дулааныг ашиглан барилгыг дулааны эрчим хүчээр хангах ажлаа, өөрөөр хэлбэл, нарнаас гаргаж авсан хамгийн анхны системийг хийж эхэлсэн дээ. Тэр үеэс туршлага судалж, энэ тухай мэдээллийг цуглуулж эхэлсэн. Хамгийн шийдвэрлэх түлхэц өгсөн зүйл гэвэл, 2009 онд анхны архитектур төлөвлөлтөө гаргаж 2010 онд барьсан “Нарны байшин” минь байсан. Түүнээс хойш яг ийм есөн төслийг хэрэгжүүлээд байна.

-Монголд ирж, манай мэргэжилтнүүдэд сургалт явуулж, хичээл заалаа. Энэ тухайд…

-2011-2013 оны хооронд “Нарны байшин”-гийнхаа барилгыг дуусаагүй байхад Монголоос анхны танилцах группийнхэн ирсэн юм. Тэр группийнхэн сэргээгдэх эрчим хүчний салбарыг маш их сонирхож байсан. Тиймээс өнөөг хүртэл Монголоос Германд хүрэлцэн ирсэн танилцах аяллын нийт зургаан группийн тавыг нь хүлээн авч байшингаа танилцуулсан даа. Хоёр жилийн өмнө манай оронд ирэхдээ Монголын барилгын зураг төсөл зохиогчдын холбооны ерөнхийлөгч, ноён Н.Дорж, Монголын барилгын үндэсний ассоциацийн гүйцэтгэх захирал, хатагтай Л.Хулан нар биднийг эх орондоо урьснаар ийнхүү Монголын архитекторууд, инженерүүдэд семинар явуулж, туршлага солилцох боломж бүрдсэн юм. Эндээс Монголын дулааны болон цахилгааны инженерүүд, архитекторууд, техникийн ажилтнууд нарнаас эрчим хүч гаргаж авах технологийг маш их сонирхож байгаа нь харагдсан.

Ярилцлагын дэлгэрэнгүйг "Барилга.МН" сэтгүүлийн 3-р сарын дугаар 94-өөс сонирхоно уу.