Барилгын материалын зах зээл идэвхжиж, барилга бүтээн байгуулалтын ажил ундран буй энэ цаг үед “Барилга.МН” сэтгүүлийн зургадугаар сарын шинэ дугаар уншигчдын хүртээл болж байна.

   Энэхүү дугаарт бид барилгын талбай дээр арын гол ажлыг нугалж байдаг барилгачид, ХАБЭА-н инженерүүдээ онцлон Дугаарын зочин болон Ажлын нэг өдөр булангууддаа урьж ярилцсан билээ. Тэдний энгүүн ярианд ажлын арга барил, үзэл бодол, ажилдаа хандаж буй хандлага гээд юу юу онцолсныг эдгээр булангаас сонирхоорой.



   Мөн “BARILGA EXPO 2018” олон улсын үзэсгэлэн яармагт оролцогчдоос хэрэгжүүлж буй төсөл, танилцуулж буй бүтээгдэхүүнээрээ байгаль орчинд ээлтэй, эрчим хүчний үр ашигтай, хэрэглэгчдийн таашаалд нийцсэн гэх мэт хэд хэдэн шалгуурыг давсан үзүүлэлтээр нь Шилдэг оролцогч байгууллагууд шалгаруулсан билээ. Тэдний ярилцлага, товч танилцуулгыг шинэ дугаараас хүлээн аваарай.

   Барилгын салбарт өргөн хэрэглэгддэг, араасаа олон асуудал бэрхшээл дагуулдаг өргөн тээвэрлэх машин төхөөрөмжийн талаарх мэргэжилтний байр суурийг энэ дугаарт мөн онцолж, Мэргэжилтний үг булангаар “Агуулгын алдаатай, хоорондоо зөрчилдсөн өргөх төхөөрөмжийн долоон дүрэм” сэдвийг хөндлөө.



   Түүнчлэн Хөндөх сэдэв буланд хөдөө орон нутагт барилга, бүтээн байгуулалтын нөхцөл байдал ямаршуу байдалд буйг томилолтоор ажилласан сэтгүүлчийн тэмдэглэлд хөндлөө. Харин Харах өнцөг буланд өнгөрөгч сард зохион байгуулагдсан "Барилгын ханган нийлүүлэгчдийн II чуулган"-нд хэлэлцсэн асуудал, төр засгийн байгууллагуудад хүргэх санал дүгнэлтийг нэгтгэлээ. 


 
   “Барилга.МН” уншигчдынхаа хүсэлтийн дагуу барилгын салбарт нэвтэрч буй шинэ дэвшилтэт техник технологийн мэдээллийг хүргэхийг хичээдэг билээ. Үүний дагуу “Бетон зуурмагийн үйлдвэрлэлд саарал усыг нэвтрүүлэх туршлага”, “Ухаалаг барилга, үнэ цэнтэй барилга”, “Хаягдал лааз ашиглан нарны халаагуур ба агаар сэлгэгч хийсэн оюутны туршлага” гэхчлэн сонирхолтой мэдээллүүдийг бэлтгэлээ.



   Цаашлаад салбарт болсон, болох гэж буй гол үйл явдлуудыг тоймлон хүргэж буйгаас онцолбол Монголын барилгын инженерүүдийн холбооны Олон улсын хурлын мэдээлэл юм. Тус хурал нь манай инженер, техникийн ажилтнууд гадны инженерүүдтэй туршлага мэдлэгээ солилцдог чухал онцлогтой билээ.

   Барилгын материал, цементийн бүтээгдэхүүн хэрэглэгч байгууллага бүрт ашигтай, төлбөрийн уян хатан нөхцөл бүхий нэгэн саналыг “Монцемент Билдинг Материалс” компаниас гаргасныг тус дугаараас хүлээн авч уншаарай.



   Мэдээж барилгын ажил захиалагч, гүйцэтгэгч талуудад хэрэгтэй Хуулийн булан, Барилгын материалын үнэ ханш булангуудаас гадна байр авах гэж буй иргэдэд зориулсан шинэ орон сууцны төслүүд, тэдгээрийн үнийн мэдээллийг дэлгэрэнгүй хүргэж байна. Мөн амины орон сууц бариулахдаа өөрт тулгарсан бэрхшээлүүдийг энгийн аргаар хэрхэн шийдэж болох талаар судалж, Япон архитекторуудын номыг Монгол хэл рүү орчуулан гаргасан бүсгүйн зөвлөгөөг Хэрэглэгчийн буланд нийтэллээ.



   Энэ мэтчилэн барилгын салбарт холбогдолтой бүхий л мэдээллийг цогцоор нь бэлтгэсэн Барилга.МН” сэтгүүлийн шинэ дугаарыг хүлээн авч уншаарай.