Барилга МН сэтгүүл

  Шинэ бүхэн ямагт таамаглалаар дүүрэн байдгийн нэгэн адил 2018 онд барилгын салбар хэрхэх бол гэсэн хүлээлт та бидний дунд хөвөрч буй энэ үед “БАРИЛГА.МН” сэтгүүлийн шинэхэн дугаар уншигчдын гарт хүрч байна. Улс орны эдийн засгийн нөхцөл байдал, гадны болон дотоодын хөрөнгө оруулалт, зах зээлийн өрсөлдөөн, ипотекийн найман хувийн зээлийн эх үүсвэр, орон сууцны үнэ ханшид хэрхэн ямар өөрчлөлт орох зэргийг тандах шаардлага барилгын салбарынхны өмнө зайлшгүй бий. Иймд барилгын салбар дахь бизнес эрхлэгчдийнхээ төлөвлөгөө гаргалтанд нь нэмэр болох, уншигчдадаа мэдээлэл өгөх зорилгоор холбогдох мэргэжилтнүүдээс мэдээлэл, дүгнэлт авснаа сэтгүүлийн Харах өнцөг булангаараа хүргэж байгаа юм.



  Харин сэтгүүлийн онцлох хүн, Дугаарын зочноор Барилга, хот байгуулалтын сайд Х.Баделханыг урьж, төр засгаас барилгын салбарт баримтлах бодлого чиглэлүүд, хэрэгжүүлэх арга хэмжээнүүдийн талаар дэлгэрэнгүй ярилцсан билээ. Түүний ярилцлага барилгын салбарт үйл ажиллагаа явуулагч хэн бүхэнд олон талт мэдээллийг хүргэж чадах биз ээ.



  Түүнчлэн барилгын салбарт ажиллаж байгаа хэн бүхэнд тулгарч байдаг ХАБЭА-н зарим асуудалд хариулт өгсөн Хуулийн булан, мөн Улаанбаатар хотод хамгийн их гардаг техникийн ослуудын нэг болох гал түймрийн талаарх судалгаа, түүнээс сэргийлэх тухай өгүүлсэн Мэргэжилтний үг булан, барилга байгууламжийн төсөвт өртгийн тухай асуудлыг хөндсөн Нэг сэдвээр булан зэргийг шинэ оны анхны дугаараас уншаарай.



  Агаарын бохирдлын асуудлыг шийдэхэд хувь нэмэр оруулахуйц, эрчим хүчний хэмнэлттэй, дулаан алдагдал багатай “Яндангүй байшин”, түүнийг ямар өртгөөр хэрхэн барьж болох тухай зөвлөмжийг Амины орон сууцны зөвлөмжөөс авах боломжтой шүү. Мөн ШУТИС-ийн Барилга, архитектурын сургуулийн оюутнуудын санаачилсан Пассив барилгын төлөвлөлт, зохион байгуулалттай танилцаарай. Үнэ өртөг хямд, хүртээмжтэй байх боломжтой энэ мэт байшинг гэр хорооллын бүсүүдэд олноор баривал нийслэл хотын утааг бууруулахад дэмжлэг болно гэж тэд үзэж байна.




  “БАРИЛГА.МН” сэтгүүлийн эрхлэгч энэ дугаарт шашин, түүх соёлын үнэт өв болсон Мэгжид Жанрайсиг бурхан хэрхэн юуны учир бүтэж, эдүгээ хүртэл хадгалагдан ирсэн тухай, түүний инженерийн шийдлийг ямар зохион байгуулалтаар хийсэн гэхчлэн сонирхолтой сэдэв хөндсөн “Тусгаар тогтнолын бэлгэдэл ба Төмөр хүн” нэртэй нийтлэлээ бэлтгэсэн юм.


  Өөрийн хүч чадалдаа итгэж, өөрийгөө дайчилж, хурцалж яваа чадварлаг интерьер-дизайнер, басхүү дэлхийн миссийн тэмцээнд улс орноо төлөөлөн амжилттай оролцсон, архитектур дизайны салбарт хүч сорьж яваа “Eden design” ХХК-ийн захирал Ц.Энхжинг Ажлын нэг өдөр буландаа урьж, түүний дотоод ертөнцөөр аялсан ярилцлагыг бэлтгэлээ.



  Сэтгүүлийн сар болгоны дугаарт шинэчлэн гаргадаг Барилгын материалын үнэ ханш, Шинэ орон сууцны мэдээлэл, Монголын барилгын материал үйлдвэрлэгчдийн холбооноос тогтмол бэлтгэж буй “Барилгын материал үйлдвэрлэх тусгай зөвшөөрөлтэй аж ахуйн нэгжүүд”-ийн мэдээлэл, Интерьер, Хэрэглэгчийн булан уламжлал ёсоор гарсныг дуулгая.



  Дашрамд хэлэхэд, “БАРИЛГА.МН” сэтгүүл нь инженер, техникийн ажилтнууд, барилгачид, эрдэмтэн судлаачид, багш нар, бизнес эрхлэгчид, үйлдвэрлэгчид, уншигчид та бүхэнтэй олон чиглэлээр хамтран ажиллахад хэзээд нээлттэй байх болно.

  Сэтгүүлийн шинэ он, шинэ улирлын захиалга явагдаж байгаа тул та бүхэн амжиж сэтгүүлээ захиалаарай.

Холбогдох утас: 99790016, 91000222