-Ажлын нэгэн өглөө таны хувьд хэрхэн эхэлдэг вэ?

-Ер нь 05 цаг 40 минутад сэрээд л миний ажлын шинэ өдөр эхэлдэг дээ. Өглөө бүр эрт боссоор байгаад дадал зуршлаараа сэрүүлэггүй босдог болчихсон юм. “Оюу толгой”-н уурхайн талбай дээр ажиллаж байгаа ажилтнуудад зориулсан зочид буудал маягийн орон сууц байдаг. Өөрийн ээлжийнхээ дагуу тэнд 28 хоног амьдрах хугацаандаа өрөөндөө хоёроос гурван хүнтэй хамт байрладаг юм. Тиймээс өглөө хувийн ариун цэврээ сахихдаа 20 минут зарцуулдаг. Үүнийхээ дараа ажилчдын блокноос гарч хоолны танхимд орох үед зургаан цаг болж байдаг. Өглөөний цайгаа уугаад, 06 цаг 15 минутад гарч автобусны буудлаас ажлын талбар руу явах 06 цаг 20 минутын унаандаа сууна. Аравхан минутын дараа захиалагч, гүйцэтгэгч талуудын удирдах ажилтнуудын өглөөний хуралдаа суух ёстой учраас цагаа ягштал баримтлах ёстой.

Уурхайн ажил өглөөнөөс орой, оройноос өглөө гэсэн хоёр ээлжээр, хоногийн 24 цагийн турш тасралтгүй явагддаг болохоор шөнийн ээлжийнхэн нөгөө ээлжийнхэндээ ажлаа хүлээлгэн өгч, мэдээлэл солилцдог. Ээлж солилцох өглөө, оройны энэ хуралд удирдах ажилтнууд л оролцдог. Хурлаараа шөнийн ээлжинд барилга угсралтын ажлыг гүйцэтгэх явцад гарсан бэрхшээл, зураг төсөлд гарсан аливаа асуудал, тодорхойгүй зүйл гарсан эсэхийг мэдэж авч, оройн хурал дээр тэдгээрт ямар арга хэмжээ авсан талаараа мэдээлдэг. Магадгүй баталсан зураг төсөл нь ажлын талбар дээр зөрөх асуудал гарч болно, түүнийг энэ хурлаар ярилцаж шийдэл гаргадаг.



-Таны хийж гүйцэтгэж байгаа ажлын онцлог гэвэл?

-Миний гүйцэтгэж байгаа ажил нэлээд онцлогтой, манай хувьд шинэ гарч ирж байгаа нэг төрлийн шинэ ажлын байр гэж хэлж болох юм. Зураг төсөл зохиогчид, төрөл бүрийн инженерийн шугам сүлжээ, барилга бүтээцийн зураг төсөл, талбайн инженерүүдийг уялдаа холбоотой ажиллуулах, тэдгээрийн ажил гүйцэтгэх явцад гарч буй тулгамдсан асуудлыг цаг алдалгүй шийдвэрлэх, нэгтгэж зангидах үүрэг хүлээж буй “Field engineer”, орчуулбал “Талбарын инженер” гэсэн орон тоон дээр ажиллаж байна.

Ингэхээр зураг төслөөс гадна талбайн ажлын уялдаа холбоо болон дарааллыг мэддэг байх шаардлага гарч ирсэн. Нэг ёсондоо координаци хийж зургийн, барилга угсралтын инженерүүдийн дунд нь мэдээллийг нь дамжуулж, холбож ажилладаг. 2016 онд энэ төсөл дээр зургийн инженерээр ажиллаж эхэлсэн ч тухайн оныхоо 12 дугаар сараас одоогийн ажлаа хүлээж авсан. Талбай дээр үүссэн инженерийн шийдэл хэрэгтэй байгаа асуудлыг “back office” буюу төв байранд ажилладаг зургийн инженерийн байр сууринаас харж, шийдэл гарган зургийг гүйцэтгэсэн “Жэкобс Инженеринг Монголиа” компанийн гадаадад байх зураг төсөл зохиогчид явуулж, тухайн зураг талбай дээр зөрчилдөж, өөрчлөх шаардлага тулгарсан, тэр нь “Оюу толгой”-н аливаа ажлыг чанартай гүйцэтгүүлэх зорилго бүхий техникийн шаардлагуудад нийцсэн гэдгийг мэдээлэх үүрэгтэй юм. Тухайлбал, “Одоо бидний санал болгож буй шийдэл нь Монгол улсын норм дүрэм, American Institute of Steel Construction буюу Америкийн Ган бүтээцийн барилга угсралтын институтийн техникийн шаардлага гэх мэт тухайлсан норм дүрэм, хангаж байна. Та анх энэ норм дүрмийг харж зураг төслөө гаргасан юм байна.” гэх мэтчилэнгээр зураг төслийг нь өөрчлөх болсон шалтгаан, учир байдлыг тооцоо үндэслэлтэйгээр мэдэгддэг. “Жэкобс Инженеринг Монголиа” нь “Оюу толгой” уурхайтай инженерийн зураг төсөл, худалдан авалт, барилга угсралт, менежментийг гүйцэтгэхээр гэрээлсэн компани юм.

Тэдний гаргасан зураг төсөл дээр “М Си Эс Проперти” болон “М Си Эс Интернэшнл” компанийн монгол инженерүүд маань ажиллаж, барилгын ажлыг гүйцэтгэж байгаа. Ийм тохиолдолд гаргасан зураг төсөл нь талбай дээр өөрчлөгдөх шаардлага тулгарвал бид хариу шийдлийг гаргаж танилцуулах хэрэг гарна. Ингэхийн тулд тэдгээр гадаад инженерүүдийн зохиосон зураг төслийн ажлын түвшинд хүрч ажиллана гэсэн үг. Энэ бүх ажлыг зохицуулж, уялдаа холбоог тааруулж ажиллах нь миний гүйцэтгэж байгаа ажлын гол онцлог болно.



-Инженеүүдийн өгч байгаа мэдээллийг нэгтгэх, дүгнэх, шийдвэр гаргах гээд... нэлээд олон асуудал шийдэх хэрэг гардаг байх нь ээ?

-Ер нь манай “М Си Эс Проперти” компани барилга, байгууламжийн зураг төсөл, барилга угсралт, төслийн менежмент, барилгын үйлдвэрлэл гэсэн чиглэлүүдээр үйл ажиллагаа явуулдаг, төсөл санаачлан хэрэгжүүлж, туслан гүйцэтгэгч байгууллага авч ажиллуулдаг байсан бол одоо “Оюу толгой”-д “М Си Эс Проперти” болон “М Си Эс Интернэшнл” компаниуд маань хамтран өөрсдөө гэрээлэн гүйцэтгэгч болж байгаа юм. Тэгэхээр бидний ажиллаж байсан байр суурь өөрчлөгдөж, бусдын гаргасан зураг төсөл дээр зарим тохиолдолд жижигхэн “value engineering”-ийн үүрэг гүйцэтгэж байна. Өөрөөр хэлбэл, гадаад инженерүүдийн гаргасан зураг төслийг өөрийн орны, тухайн газрын цаг агаар, уур амьсгал, хөрсний онцлог, цаг үед үүссэн нөхцөл байдалд нийцүүлж, хугацаа хожих зэргээр ажиллана. Зарим тохиолдолд тухайн ажлыг богино хугацаанд өндөр зардалтайгаар хурдан гүйцэтгэх үү, бага зардлаар урт хугацаанд дуусгах уу гэдгийг шийдэх хэрэг гарна. Ер нь инженерүүд бид үүссэн нөхцөл байдалд гурваас дөрвөн хувилбараар шийдэл гаргаад, менежерүүдэд танилцуулж тэдний гаргасан шийдвэрээр ажил цааш үргэлжилдэг...

Дэлгэрэнгүй ярилцлагыг "БАРИЛГА.МН" сэтгүүлийн №93-аас уншаарай.