Барилга МН сэтгүүл

   Өөр өөрийн тодотгох сэдэвтэй булангуудаараа олон талын мэдлэг, мэдээллийг олгож байдаг “Барилга.МН” сэтгүүлийн шинэ дугаар уншигчдын гарт хүрч байна. Сэтгүүл энэ салбарт өнгөрсөн сард болж өрнөсөн үйл явдал, шинэ сарын шинэхэн өдрүүдэд болох үйл явдлыг тоймлон хүргэсэн хуудсуудаараа уншигч танд товч тодорхой мэдээллүүдийг нэг дороос хүргэхийг зорьдог билээ. Сар шинийн баярт өдрүүдийг угтан бид нүүр хуудастаа байгальд ээлтэй, чамин тансаг хийцээрээ алдартай модон тавилгын үйлдвэрлэл, Францын “Notting Hill” брэндийг онцоллоо.

   Харин сэтгүүлийн онцлох хүнээр “Байшин үйлдвэрлэх комбинат”-ынхаа нээлтийн туузыг хайчлаад тун удаагүй байгаа “Эрэл” группийн ТУЗ-ийн дарга Б.Эрдэнэбат эрхмийг сонгож, түүнтэй Монголд үйлдвэрлэл явуулж, бизнес эрхлэхийн “сайн, муу”-г илэн далангүй ярилцсанаа хүргэж байна.



   Сар бүр асуудал хөндсөн сэдвээр редакцын уулзалт хийж, холбогдох мэргэжлийнхнийг урьж ярилцдаг “Харах өнцөг” буланд зураг төслийн салбарыг онцолсон билээ. Аливаа хот суурин газрыг төлөвлөн байгуулах, цаашид хөгжүүлж авч явахад яах аргагүй онцлох үүрэгтэй ажилладаг зураг төсөл зохиогчдын ярианаас агаар, хөрсний бохирдол, авто замын түгжрэл, чанаргүй барилгын үндэс юу болох, тэдгээрийг хэрхвэл ангижирч болох талаар нэгд нэгэнгүй уншиж болох нь ээ.



   Цаашлаад барилгад гарч буй нийтлэг алдаа, зөрчлүүд болон чиг үүргийн үл нийцлүүдийн талаар ярьсан НМХГ-ын Барилгын техникийн хяналтын улсын ахлах байцаагч У.Ёндонгийн ярилцлагаас уншаарай. Бид хаана, юун дээрээ хамгийн их алдаа гаргадгийг мэргэжлийн хүний нүдээр нэг харах гээд үзэхэд гэмгүй болов уу.

   “Цемент бол стратегийн бүтээгдэхүүн, бүтээн байгуулалтын талх” нийтлэлээс манай улсын цементийн зах зээлийн талаарх дэлгэрэнгүй мэдээллийг аваарай. Цаашлаад манай улсад үйл ажиллагаа явуулж буй цементийн үйлдвэрүүдийн хүчин чадал, бүтээгдэхүүний төрөл, байршил зэрэг хэрэгтэй мэдээллийг багтаасан шүү. Түүнчлэн энэ салбарт үйл ажиллагаа явуулагч хэн бүхэнд хэрэгтэй “Тохирлын гэрчилгээтэй барилгын материалын бүтээгдэхүүн үйлдвэрлэж байгаа үйлдвэрүүдийн жагсаалт”-ыг нийтэллээ.

   Уламжлал ёсоор сар бүр бэлтгэдэг “Туршилт, судалгаа” булангаас шинэ, соргог, үнэ цэнтэй мэдээллийг өгөхийг зорьдог билээ. Энэ удаад Мандал-Овоогийн шавраар галд тэсвэртэй тоосго үйлдвэрлэж болохыг батлан туршсан мэдээллийг хүргэж байгаа юм. Таны сонорт хүргэхээр зорьсон бас нэгэн чухал зүйл бол барилгын салбарын төрийн бус мэргэжлийн байгууллагуудын 2018 онд хийж хэрэгжүүлэх ажлын төлөвлөгөө, мэдээлэл юм. Мөн Хуулийн буланд онцолсон татварын тухай мэдээлэлд анхаарал хандуулаарай. Энд Татварын тухай хуульд орсон өөрчлөлтүүдийн талаар, тэдгээр нь үл хөдлөх эд хөрөнгөд холбоотой эсэх асуудлыг хөндөн мэдээлэл бэлтгэсэн юм.



   Түүнчлэн “Оюу толгой”-н далд уурхайн бүтээн байгуулалтын ажилд гар бие оролцон ажиллаж яваа инженер залуусын нэгэн төлөөлөл болсон Б.Адилбишийн “Ажлын нэг өдөр”-өөр зочиллоо.



   Ногоон ханын үзэл баримтлал, цаашлаад таримал мод бутыг арчлах тухай дэлгэрэнгүй зөвлөгөөг мэргэжлийн хүний бэлтгэснээр хүргэж байна. Эдгээр мэдээллээс орон сууц, хувийн байшиндаа хэрхэн тав тухтай, цэвэр агаараа сэлгэн амьдарч болох тухай сонирхолтой зөвлөмжийг аваарай. Харин үргэлжлүүлээд Монгол гэрт ариун цэврийн байгууламж барьж, ахуйн асуудлаа иж бүрнээр нь шийдэж чадсан нэгэн айлд зочилсон тэмдэглэлийг уншаарай. Энэ санааг ганц айл хэрэгжүүлээд зогсох биш, гэр хороолол, зуслангийн бүсэд амьдарч буй айл өрхүүд, аялал жуулчлалын компаниуд ч ашиглах гайхалтай жишээ болсныг онцолъё.



   Амьдралд ойр, хамгийн хэрэгтэй энэ бүх зөвлөмжүүдийг нэг дороос авах боломж “Барилга.МН” сэтгүүл юм.