Сүүлийн хэдэн жил хамгийн их эрэлттэй барааны нэг бол агаар цэвэршүүлэгч болоод байна. Үүний гол шалтгаан нь мэдээж агаарын бохирдол. Гэвч агаар цэвэршүүлэгч аваад бүх асуудал шийдэгдчихгүй нь ойлгомжтой. Учир нь барилга байгууламжийн агааржуулалт салхивчийн асуудал тийм ч сайнгүй байгаа нь илхэн. Уг нь бол барилга өөрөө амьсгалж байж чийг мөөгөнцөргүй байхаас гадна агаарыг дотогш нэвтрүүлэхдээ утааг нь шүүдэг, байгалийн агаарыг орон сууц гэлтгүй гэр хорооллын амины орон сууцанд агаарыг цэвэршүүлээд сэлгэх нь наанадаж хүний эрүүл мэндэд цаанадаж уг барилга байгууламжийн  урт насжилтанд нөлөөлдөг. 


       Хэрвээ ариун цэврийн өрөөнд бохир үнэртэх, гал тогооны цонх хөлрөх, хананы буланд мөөгөнцөр үүсэх, утаа орж ирэх гэх мэт асуудлууд тулгарч байгаа бол танайх салхивч, агааржуулалтын асуудалтай байна гэж ойлгож болно.
        Хуучны угсармал болон тоосгон барилгууд ердийн үйл ажиллагаа бүхий салхивчийн системтэй байдаг бөгөөд  эдгээр барилгуудад модон цонхоор агаар сэлгэлт явагддаг байж. Гэвч сүүлийн үеийн барилга, тэр дундаа хуванцар /PVC/ цонхтой барилгад ихээхэн үзэгдэх болсон дээрх үзэгдлүүд нь агаарын солилцоо байхгүйгээс хоол, цайны уур цан гадагшилж чадахгүй цонхон дээр очиж бууж байгаа учир цонх хөлөрч цанатаж байгаа юм.  Цонх онгойлгох гэхээр даараад, хаачихаар хөлрөөд байдаг бол цонхондоо жижиг салхивч хийлгэх шаардлагатай.


      Угаалгын өрөө болон ариун цэврийн өрөөний үнэр, чийг гадагшлахгүй байх нь эрүүл мэндэд  муугаар нөлөөлж, уураг тархи, бие махбодид хүчилтөрөгчийн дутагмагшлыг урт хугацаанд үүсгэж, үнэр, бохир агаар, элдэв бичил биетэн хүний биед муугаар нөлөөлж харшлын шинж чанартай хамар хоолой барьсан ханиад хүрэх, ам үрэвсэх, арьс хуурайшиж загатнах, гүвдрүү үүсэх гэх мэт муу үр дагавартай бөгөөд салхивчийнхаа системыг зөв буруу угсарсан эсэхийг мэргэжлийн хүнээр шалгуулах, хэрэв бөглөрөөгүй байгаа бол албадмал үйл ажиллагаатай салхивчийн сэнс тавих, тус өрөөний хаалгануудад жижиг сараалж хийж өгөх арга хэмжээг авах нь зохилтой.  
Гэрийн мөөгөнцөр нь модны бүтцийг сүйтгэдэг гол дайсан юм. Мөөгөнцөр үүссэнийг төвөггүй мэдэж болно. Гуалин дүнзний хана болон модон шаланд амархан үүсэж бий болдог. Мөөгөнцөр нь анх үүсэхдээ хөвөн шиг ноолорсон шар үс эсвэл хөвөнгийн цагаан судал шиг болж дараа нь шар, ягаан, хөх ягаан толбо болон хувирдаг. Улмаар мод харлаж ан цав сууж эхэлдэг. Мөөгөнцөрийн үйл явц маш эрчимтэй явагддаг бөгөөд  ялангуяа зөөлөн модоор баригдсан байшинд болон чийгтэй нойтон газарт мөөгөнцөр хурдан тархаж газар авдаг.  

      Амьдарч буй орон сууц нь дулаан алдагдал ихтэй, агааржуулалт муутай, ам бүл олон бол  усанд орох хүний тоогоор л чийг хурган хургасаар хөгц мөөгөнцөр үүсэх нэн таатай орчин бий болсоор байдаг гэдгийг анхаарах нь зүйтэй.
       Ялангуяа хуучны гэгдэх орон сууцууд бүр суурийн давхар, орц хонгилд нь хөгц мөөгөнцөр үүрэлсэн байдаг. Үүнийгээ урсгал засвараар будаад өнгөрдөг. Хэсэг хугацааны дараа дахиад л бий болчихдог. Нүдэнд харагдахгүй болсон ч агаарт үүссэн хор хөнөөл нь оршсоор хордуулсаар байдаг гэдгийг мартаж болохгүй. Үүнийг л оршин суугчид зүгээр хараад өнгөрөхгүй өөрсдийнхөө эрүүл амьдрах орчин, үр хүүхдүүд болон өөрсдийн эрүүл мэндийн төлөө алхам хийх нь зүйтэй.
 Байшин барилгыг агааржуулах  гурван сонголт байна:

Мэдээж байгалийн агааржуулалт нь олон давуу талтай. Байгалийн агаарын солилцоо дутагдалтай бол нэмэлт тоног төхөөрөмж ашиглаж агааржуулалт хийх шаардлагатай. Хэрэв та аль хэдийн хувийн байшинг худалдан авсан бөгөөд босоо суваг тавих боломжгүй бол албадан агааржуулалтын систем нь танд тааламжгүй үнэр болон өвчнөөс сэргийлэх түр зуурын арга болох юм. Ингэж агаараа сэлгэж, бохирдсон агаарыг зайлуулах ёстой.
Агаар сэлгэлтийн систем нь орон сууц, олон нийт, үйлдвэрийн барилгад хүн аж төрөх, ажиллах орчны агаарын чанарыг хангах эрүүл ахуйн техник юм. Энэ зөвхөн агаарын чанарын асуудал биш цаашлаад орон сууцанд гал гарах үед утаа барилгын бусад хэсэгт тархахгүй байх. Хүмүүс аюулгүй байдлаа ханган тухайн орон сууцнаас гарахад нь сайнаар нөлөөлөх учиртай. Барилга байгууламж барихдаа дулаан алдагдал багатай байхыг нь бодож бив битүү хийх биш агааржуулалт салхивчийн асуудлыг эн тэнцүү авч үзэх ёстой. Цаашид халаалт, агаар сэлгэлтийн системийг чанартай төлөвлөхийн тулд тавигдах шаардлагын дагуу зураг төсөлд тусгах, зураг төсөл зохиогчдын чадавхийг сайжруулах, сургалт зохион байгуулах, тусгай зөвшөөрөл өгөхдөө тухайн байгууллагын чадавхийг харж шийдэж байх хэрэгтэй. Салхивчийн хоолойг хүмүүс нимгэн төмөр л гэж ойлгодог. Гэтэл энэ нь өөрийн гэсэн үйлдвэрлэх болон угсрах арга барилтай, түүнийг мэргэжлийн хүмүүс л хийж гүйцэтгэх учиртай. Мөн есөн давхраас дээш барилгад утаа зайлуулах систем заавал хийх ёстой. Хийгдэж байгаа зарим нь ёс төдий байна. Утаа зайлуулах системийг шалгаж хүлээж авдаггүй, ашиглалтын явцад байнга шалгаагүй, гал гарсан үед л өнөөх системээ санадаг нь нууц биш юм.
Барилга байгууламжид агааржуулалт дутагдалтай байгаагийн нэг гол шалтгаан бол агааржуулалтын системд хөрөнгө оруулалт бага төсөвлөгддөг. Ялангуяа орон сууцны барилгад маш бага төсөвлөгддөг учраас ёс төдий хийж гүйцэтгэх явдал элбэг тохиодог байна.  Үүнээс болж эцэстээ хэрэглэгч хохирч үлддэг. Тиймээс агааржуулалт, салхивчийн угсралтыг хийж буй нэр хүндтэй компаниудаас эхлээд хувиараа хийж буй хүмүүс энэ тал дээр мэргэжлийн бөгөөд сэтгэлтэй хандах нь монголын хүн амын эрүүл мэнд бөгөөд барилгын насжилтанд маш сайн үр нөлөөтэй юм.