Барилга МН сэтгүүл

    Орон сууцыг дулаан байлгах гол эх үүсвэр нь янз бүрийн халаалтын систем, зуух байдаг ч дулаан алдагдал ихтэй үед эдгээр нь хичнээн сайн ажилладаг байгаад ч нэмэргүй гэж мэргэжилтнүүд зөвлөдөг.  Иймд хүйтний улиралд амины орон сууц болон угсармал байрыг гаднаас эсвэл дотроос нь дулаалах нь чухал юм.  Учир нь орон сууцны  шал 10%, хана 24%, тааз 42%, цонх 12%, хаалга 6%, яндан 6% -иар дулаан алддаг.
 

  Дулаалга сайн хийсэн тохиолдолд  халаалтын зардлыг бууруулах, дулаан дамжилтын хувьд жигд байх зэрэг олон давуу талтай.  Хэрвээ та орон байраа дотор талаас нь дулаалахаар шийдсэн бол нэн түрүүнд шалаа дулаалахыг зөвлөж байна. Танай орон сууцны шалны бүтцээс хамааран дулаан тусгаарлагч материал болон дулаалах арга нь өөр өөр байхыг санаарай.

   Энэ төрлийн шалыг ихэвчлэн царс, агч мод, яшил зэрэг хатуу модоор хийдэг байсан ч өнөө үед модны үртэс, нийлэг материалаар хийдэг болсон. Паркетан шалыг шахахаас өмнө дулаалгын зөөлөвч буюу субстратыг зөв сонгох нь чухал. Субстрат нь дотроо хэд хэдэн төрөл байдаг.

Isolon PPE     

   Паркетан шалыг суурилуулахад нийтлэг хэрэглэдэг субстрат бол Isolon PPE юм. Энэ материал нь ус чийгийг сайн тусгаарлаж, дулаан дамжуулахдаа сайн, бага жинтэй, найрлага дахь химийн бодис нь бактери, шавьжийг устгадаг зэрэг давуу талтай ч сул тал нь хэлбэрээ богино хугацаанд алддаг, хэт ягаан туяанд мэдрэмтгий байдаг.

Полистирол бүрхэвч   

   Полистирол субстрат нь шалны дулаалгад тохиромжтой хэрэглэхэд хялбар, дулаанаа сайн барьдаг. Ус чийгийг сайн тусгаарладаг, бетоны чийг ба уурын нөлөөллийн урвалд ордоггүй, хөгц мөөгөнцөр үүсгэдэггүй. Ахуйн хэрэглээний нөхцөлд 15-20 жилийн хугацаанд элэгдэж мууддаггүй давуу талтай. Сул тал нь эдэлгээний хугацаа дуусахад паркетан шаланд суулт үүсэх сөрөг нөлөө үзүүлдэг.

Cork субстрат

    Cork субстрат нь чанарын хувьд бат бэх ашиглалтын хугацаа урттай. Үйсэн бөөгнөрсөн үйрмэгээр хийсэн тул дуу чимээг багасгаж, 12-15 дб цохилт доргилтыг тэсвэрлэх чадвартай.

Амины орон сууцны шалыг хэрхэн дулаалах вэ?

   Амины орон сууцны модон шалны дулаалгын түгээмэл арга нь давхар дулаалгын систем юм. Энэ дулаалгын арга нь бялуу шиг давхарлаж байрладгаараа онцлогтой.  Жишээ нь: Шалны суурь – усны хамгаалалт – дулаалгын материал – чийг тусгаарлагч – төгсгөлийн давхарга буюу шал байрлана. Дулаалга хийх явцад хамгийн гол материал бол дулаан тусгаарлагч юм. Дулаан тусгаарлахад түгээмэл хэрэглэдэг материалд  Эрдэс хөвөн, полистирол хавтан, асгамал материал зэрэг орно. Эдгээр материалуудыг сонгохдоо өртөг багатай, урт удаан хугацаанд ашиглагддаг,  дотоодод үйлдвэрлэгдсэн, тээвэрлэх, угсрахад хялбар, эрүүл мэндэд ээлтэй байх тал дээр анхаараарай.

Эрдэс хөвөн дулаан тусгаарлагч материал

    Тус материалыг дулаалгад ашиглахдаа бетон, өрөгт бүтээцээс бусад шийдэлд дотор талаасаа уур тусгаарлагч хийх ёстой. Учир  нь эрдэс хөвөн дулаалга нь бүтцийн хувьд утсархаг тул чийгийг өөртөө шингээх талтай ч дулаан тусгаарлалтын хувьд хамгийн сайн нь байж чаддаг.

Полистирол хавтан дулаан тусгаарлагч материал

   Полистирол хавтан нь агаарыг 90% -аас дээш тусгаарладаг. Шалны дулаан тусгаарлалт нь ус нэвтэрдэггүй давуу талтай. Дулаан тусгаарлах материалын хувьд шатамхай биш полистирол хавтанг амины орон сууцны дулаалгад ашиглахад тохиромжтой.



Асгамал дулаан тусгаарлагч материал

  Хамгийн түгээмэл хэрэглэдэг материал юм. Энэ материалд үртэс, үнс шаарга, керамзит зэрэг багтана.
    Керамзитын үйлдвэрлэлийн түүхий эд нь шавар. Шаврын бүтэц, чанарын онцлогоор нь үйлдвэрлэгдэж буй керамзитын чанарыг тодорхойлно.  Дулаалгын материал хэдий чинээ хөнгөн байх тутам төдий чинээ дулаан байна. Керамзитын хөнгөн чанар нь түүний үрэл нэг бүрийн дотор агаарын бөмбөлөг агуулагдсанаар керамзитыг дулаан тусгаарлах онцгой шинж чанартай болгож байгаа юм.



Керамзит юугаар үнэ цэнтэй вэ?

Керамзитыг үйлдвэрлэхдээ ямар нэгэн химийн хортой бодис ашигдадаггүй бөгөөд зөвхөн шавар хэрэглэдэг. Асар өндөр температурын үйлчлэлээр хөөсөрсөн үрэл нь:
1. Дулаан хадгалах чадвар сайн
2. Дуу тусгаарлалт өндөр
3. Бат бэх, удаан эдэлгээ
4. Хүйтэнд тэсвэртэй
5. Чийгэнд тэсвэртэй
6. Галд шатахгүй
Хөнгөн жин гэх мэт шинж чанаруудыг өөртөө агуулдаг.

 

---