-Яагаад дизайнер мэргэжлийг сонгох болов. Гэр бүлд тань барилгын инженер мэргэжилтэй хүн байсан нь мэргэжил сонголтод нь нөлөөлсөн байх?

 -Миний аав “Монгол лифт” компанийн захирал Доржпүрэв гэж хүн байсан. Цахилгааны инженер мэргэжилтэй. Хүүхэд ахуй насандаа Төрийн ордноос эхлээд социализмийн үеийн бүхий л байшин барилга, томоохон үйлдвэрийн газраар аавыгаа дагаж их явсан. Наймдугаар ангидаа аавынхаа туслах ажилчнаар ажилладаг байлаа. Тэр үед интерьер засал гэсэн ойлголт бараг л байдаггүй байсан. Харин би “Дотор заслыг нь ингэж хийвэл тун аятайхан болох юм. Ийм зүйл хаана байдаг юм бол” гэж боддог байлаа. Ингээд дунд сургуулиа төгсөөд аавынхаа “шахалт”-аар тухайн үеийн Цагдаагийн дээд сургуульд орохоор шалгалт өгсөн. Үнэндээ дотроо тийм ч дуртай байгаагүй. Шалтгалтад ороод тэнцсэн хэдий ч сургуулиа орхичихсон. Аав маань ч тэр үед “За өөрөө мэдэж байвал яахав” гэж байсан.

Харин ээжийн маань аав “Бөмбөгөр ногоон театр” гэж байхад “Учиртай гурван толгой”, “Шарай голын гурван хаан”, “Цогт тайж” гээд тайз, дэлгэц, театрын томоохон бүтээлүүд дээр тайзны зураачаар ажиллаж байсан Чимэддорж гэж хүн байдаг. Урчуудын эвлэлийн хорооны анхны гишүүн бөгөөд Сүхбаатарын хөшөөний рельефийн ажил, ХААИС-ийн буга, “Оюу толгой”-н тэмээ зэрэг амьтдыг хийж байсан мундаг барималч хүн. Энэ хүмүүсийн ген надад байдаг юм болов уу гэж боддог. Би зурах дуртай, техникийн талын зүйлд илүү сонирхолтой хүүхэд байсан. Миний үед интерьерийн дагнасан сургууль гэж байгаагүй. Тиймээс ааваасаа нууцаар Дүрслэх урлагийн дээд сургууль буюу одоогийн СУИС-д шалгалт өгч, тэнцээд Металл  дизайн урлагийн ангид элсэн орсон. Үндсэн хичээл маань зураг, өнгө будаг, зохиомж, чимэглэл байлаа. Ингэж л би интерьерийн талаарх анхны ойлголтоо авсан даа.
            -Дүрслэх урлагийнхан гол төлөв бүтээлээрээ үзэсгэлэн гаргадаг. Суралцаж байх хугацаандаа та ямар амжилт үзүүлж байсан бэ?
 -Сайд асан Д.Бямбасүрэн гуйан охин Хонгорзул багш маань надад зурах арга барил, зохиомжийн бүхий л мэдэгдэхүүнийг зааж сургасан ачтай хүн. Дараа нь мэргэжил сонголтын хичээл дээр Төрийн дархан Д.Энхдаваа багшийн шавь болж, деталл ажлын талаарх ойлголтоо авсан шүү. Мундаг багш нартай таарсан би азтай хүн. Сургуулиа таван жил суралцаж төгсөөд, Урчуудын эвлэлийн хороон дээр өөрийн бие даасан анхны “Мастерплан” нэртэй үзэсгэлэнгээ гаргаж байлаа. Үзэсгэлэн маань долоо хоног хиртэй гарч, ганц хоёр бүтээлийг маань Герман улс руу борлуулахаар авч явсан. Дөнгөж төгсөж байгаа оюутнуудын хувьд арга барилаа олох гэж нэлээд эрэл хайгуул хийдэг. Өөрийн гэсэн техниктэй болохоор их зүйл үзэж, харж суралцдаг. Миний хувьд үндэсний хэв маягийг модерн загвартай хослуулах дуртай. Энэ чиглэлийг түлхүү барьж ажилладаг. 
         -Ажлын гараагаа хаанаас эхэлсэн бэ. “ГерБридж” компанийг яагаад үүсгэн байгуулах болсон бэ?
-1996 онд сургуулиа төгсөөд “Гангар инвест” компанид туслахаар ажилд орсон. Шавар, шороо зөөхөөс гадна амралтаараа барилгын туслах ажилтан хийдэг байлаа. Тэр үед компани биш бригадын системээр ажилладаг байсан юм. Хэтэвчиндээ 140 мянган төгрөгтэй, хэдэн ширхэг халив (автерк), түлхүүр, хөрөөтэй явдаг байсан. Ингээд 2001 оноос дөрөв таван багажтай, түүнийгээ цүнхэндээ хийгээд угсармал орон сууцны айлуудад засвар хийж явдаг болсон. “ГерБридж” компанийг анхлан Германы хөрөнгө оруулалттай байгуулсан юм. Германы төслийн хүрээнд бид эхлээд туслан гүйцэтгэгчээр ажиллаж байгаад төсөл хэрэгжиж дууссанаар өөрийн үндсэн компаниа 2010 онд байгуулсан. Манайх ихэвчлэн оффис, томоохон үйлдвэрүүдийн засал чимэглэлийг гардан хийдэг.
         -Өнгөрсөн найман жилийн хугацаанд ямар төслүүд дээр ажилласан бэ. Энэ талаараа сонирхуулж ярихгүй юү?
-Манай компанийн гүйцэтгэсэн төслүүдийн талаарх нарийвчилсан тоо одоогоор байхгүй байна. Ажил болгоод тоолж үзээгүй юм аа. Гэхдээ бараг л ажиллаж үзээгүй оффисийн барилга гэж байхгүй болов уу. Бүхий л төсөлд их, бага хэмжээний оролцоотой явсан бас явдаг гэсэн үг. Энэ жилийн хувьд Элчин сайдын яамдуудын ажил, “Вагнер Ази”, Улаанбаатар болон Худалдаа хөгжлийн банк зэрэг албан газрын интерьер,экстерьер, дизайн гүйцэтгэл дээр ажилласан. Заримынх нь хараахан дуусаагүй байна. Өнгөрсөн хугацаанд давхардсан тоогоор манайд 6000 хүн туслан болон үндсэн ажилтнаар ажиллажээ.  



      -Интерьерийн шийдлээ тухайн жилийн өнгө төрх, трэндтэй уялдуулж гаргадаг уу. Дизайн, загвар төлөвлөлтийн талаар ярихгүй юү. Ерөөс интерьерийн тухай ойлголтыг товчхон өгвөл?
-Би Англид интерьерийн чиглэлээр мэргэшсэн нэгэн багшийн сургалтад суусан юм. Интерьер бол хүний төгс хэрэглээ гэж тэр хэлсэн. Хүнд зориулсан төгс хэрэглээ учир гоо сайхан байхаас илүүтэй яаж тав тухтай байх вэ гэдгийг эрхэмлэх ёстой гэсэн санаа. Оффис бол хүний хоёр дахь гэр. Хүмүүс амьдралынхаа ихэнх цагийг ажил дээрээ өнгөрүүлдэг. Гэтэл манай улсад тулгамдаж буй гол асуудал нь стандарт боллоо. Бидэнд өнөөдрийг хүртэл интерьер, экстерьер, дизайны тогтсон стандарт гэж алга. Тухайлбал, цахилгааны суурь залгуур, унтраалга зэргийг янз бүрээр хийдэг. Нэг дээр, нэг доор, розетканууд нь төрөл бүр байх жишээний. Үүнээс болж үндсэн интерьерийн хийцлэл зөрчихдөг. Мөн агааржуулалтын үндсэн системийг стандартын дагуу хийх ёстой байдаг. Гэтэл дуу чимээ, акустик байдал, агаар сэлгэлт, эрчим хүчний зарцуулалт зэргийг манайхан огт тооцдоггүй. Ерөөс ямар ч стандарт манай улсад байдаггүй. Тиймээс бид барилга эхлэхээс өмнө суурь өгөгдлийг маш сайн судалж, захиалагч талдаа олон улсад мөрддөг стандартыг барих шаардлага тавьдаг. Хүний тав тухтай орчинг бүрдүүлнэ гэвэл олон улсад мөрдөж байгаа стандартыг Монгол Улс нэвтрүүлэх зайлшгүй хэрэгтэй байна.
      -Интерьерт өнгө будаг маш чухал байр суурь эзэлдэг. Өнгийг яаж тусгаж уусгадаг вэ?
-Намрын улиралд байгаль дэлхий өнгөө янз бүр болгон өөрчилдөг. Тэдгээр гайхалтай олон өнгөний зохицлууд нь интерьерийн ажилд зайлшгүй хэрэг болдог. Хаа хамаагүй, зохицолдоогүй өнгийг хооронд нь хольж, хутгаад байж болохгүй. Хүн байнгын харж байгаа зүйлдээ илүү дассан, түүндээ сэтгэл ханамжтай байдаг. Зуны улиралд байгаль дэлхий ногоон өнгөөр хувцасладаг бол намартаа шарлаж, өвөлд цагаардаг шүү дээ. Аль ч улиралд нарны өнгө, түүний тусгал, үүнээс үүсэх  гэрэл сүүдэр хэзээд өөрчлөгддөггүй. Иймд тухайн өнгө хоорондын нэгдэл, уусгалт нь хүний нүдэнд гоо зүй талаасаа тун сайхан харагддаг. Тиймээс яг энэ мэдрэмжийг интерьерийн өнгөнд тусгаж өгөхийг би зорьдог. Монголчуудын нийтлэг дуртай өнгө гэж байна Бараа, материал сонгон авч буй хүмүүсийн сонголтоос харахад ихэвчлэн элсэн шаргал, модны шаргал өнгийг чухалчилдаг. Харин оросууд цэцэг навчинд дуртай бол солонгосчууд усан цэнхэр, ногоон, ягаан өнгөнд илүү дуртай байдаг.
    -Албан газруудын интерьер, дизайныг хэрхэн гаргадаг вэ?
-Хүний амьдрах, ажиллах орчны интерьерийн өнгө маш чухал. Хэдий чинээ тав тухтай орчин бүрдүүлнэ төдий чинээ ажлын гүйцэтгэл сайн гардаг ч гэж хэлдэг. Миний арга барил, сонголтын тухайд гол төлөв эко орчинтой, бага зэрэг үндэсний хэв маяг оруулахыг зорьдог. Жишээлбэл, Азийн хөгжлийн банкны төв оффис болох Манила, Бээжингийн албан газрын интерьерт тухайн улсынх нь хэв маяг шингэсэн байдаг. Энэ онд манайх Азийн хөгжлийн банкны “Гэр” хурлын өрөөний интерьерийг үндэсний хэв маяг шингээж хийсэн. Энэ нь Монгол Улсын Азийн хөгжлийн банкны салбарт орж ирсэн мэт сэтгэгдэл төрүүлж байгаа юм.
    -Хувцас загварын салбарт Парис, Миланы загварын шоунууд тухайн жилийн чиг хандлагыг тодорхойлдог. Тэгвэл интерьерийн чиг хандлагад нөлөөлөх улс эсвэл дизайнерууд байдаг уу?
-Токио, Нью-Йорк, Лондон, Парис зэрэг орнууд интерьерийн чиг хандлагыг урдаа барьж явдаг. Эдгээр орны араас бусад орон дагалдаж, ерөнхий хэв маягийг нь авч явдаг юм. Хувцас загварт 2018 оны трэнд болж байгаа загварыг дагадаг бол интерьер яг энэ зарчмаар л явдаг. Дизайнеруудын хувьд байнгын үзэсгэлэн, экспод оролцож, материалын өнгө будаг, чанар хийц хэрхэн өөрчлөгдөж байгааг үргэлж соргогоор мэдэрч, мэддэг байх ёстой. Тамирчин хүмүүс байнгын бэлтгэлтэй байдаг шиг дизайнерүүд үргэлж мэдээлэлтэй байж, үүнийгээ шинэчилж, шинийг эрэлхийлэх ёстой болдог. Жаахан л мэдээлэлгүй байвал хоцрогдчих гээд байдаг талтай. Монгол дизайнерууд маш чадварлаг болсон. Ингэхдээ өөрсдийн гэсэн стандарт, хэв загвартай болж байгаа нь анзаарагдаж байна.
    -2019 оны интерьерийн чиг хандлага юу вэ. Миний анзаарснаар юмс илүү минималист тал руу шилжиж байх шиг. Хувцас загвар шиг интерьерт мода эргэнэ гэж байдаг уу?
-Одоогийн голлож буй интерьерийн загварт 1970-1980-аад оны өнгөний шийдэл орж ирж байгаа. Оффисийн дөрвөн хана байлаа гэхэд нэг булан нь тэс өөр өнгөний шийдэлтэй байх жишээтэй. Энгийн мөртлөө донжтой, дэгжин байх хандлага давамгайлж байна. Энэ загварын хандлага, шийдэл нь 2020 он хүртэл үргэлжлэх болов уу.
   -Дэлхийн орнуудын интерьерийн чиг хандлагаас Монгол Улс хэр хоцрогдож байна вэ. Эсрэгээрээ манлайлдаг байж ч болох?
-Манай улсад сүүлийн хэдэн жилээс л интерьерийн салбар гэнэт түрэн гарч, эрчимтэй хөгжөөд байгаа юм биш. Суурь өгөгдөл, соёл нь хэдийнэ байсан гэж хэлнэ. Урчуудын эвлэлийн дэргэд бүхэл бүтэн Соёл урлагийн салбар байсан шүү дээ. Энэ салбарын урчууд Төрийн болон Хуримын ордон гээд олон газрын дотоод засал, дизайныг хийсэн. Тэрчлэн монгол гэрийн хэв маягт интерьерийн суурь өгөгдлүүд ч байдаг. Дээр үед нэг барилга барихдаа зэрэгцээ орших барилгын өнгө будагтай ойролцоо байлгахыг зорьдог байсан. Энэ нь хот төлөвлөлтийг ямар эмх замбараатай хийж байсныг илтгэж буй. Харин өнөө цагт хүн бүр өөр өөрийн өнгө үзэмжээр л ажиллаж байна. Бидний үед хавтан, хадааснаас өөр зүйл байгаагүй. Хар эмульс ч олдодгүй байсан. Харин одоо зураг төсөл сайн байвал үндсэн интерьерийн өнгө дизайныг ямар л бол ямар төрлөөр гаргах бүрэн боломжтой.
Манай интерьерийн чиг хандлага дэлхийн араас явж байна гэж бодохгүй байна. Бидний ерөнхий хийцлэл, интерьерийн загвар маш хурдан солигддог. Энэ нь магадгүй мэдээллийг олон сувгаас авч байгаа холбоотой байх. Энэ бол бидний давуу тал. Дэлхийн хаана ч очсон манай улсын интерьер, экстерьерийн зураг гологдохгүй, заримдаа илүү ч байх магадлалтай шүү. Дэлхийн чиг хандлага байгаль орчинд ээлтэй, дахин боловсруулах чадвартай, зай талбайг зөв ашигласан, энгийн хэрнээ стандартад нийцсэн байх чиглэл рүү аажмаар хэвийж байгаа. Би дэлхийн номер нэг дизайнер Заха Хадидийн шоурүүм дээр очиж үзсэн. Тэр хүний уран бүтээлүүд маш энгийнээс эхлэлтэй. Ингэхдээ эко байх зарчмыг баримталж буй нь дэлхийн чиг хандлагыг тэргүүлж, тодорхойлж байгаа нууц юм.




-Интерьер, экстерьер, дизайн гаргахад зураг маш чухал үүрэгтэй. Зураг төсөл төлөвлөлтийн талаар болон компанийнхаа баримталдаг гол зарчмаас сонирхуулбал?
-Түрүүнд хэлсэнчлэн аль болох дэлхийн стандартыг барьж ажиллахыг гол зорилгоо болгодог. Олон улсын төслүүд дээр ажиллаж байхад зураг нь маш энгийн, ойлгомжтой байдаг. Энэ нь стандартын дагуу хийсэнтэй л холбоотой. Хананы зузаан, цонх, хаалга гээд бүгд ямар стандарттай байх ёстой тэрийг л барьж зургаа хийдэг. Манайх шиг өөр материалаар хийчихнэ, орлуулчихна гэсэн ойлголт байдаггүй. Энэ нь ажил хийхэд маш дөхөм байдаг. Түүнээс гадна барилгын материалын чанарын тухай дуугарах цаг нь болсон гэж боддог. Маш чанаргүй, хүний биед хортой материалыг сонгож байна. Үнэ хямдыг нь харж худалдан авсаар байгаа нь тун харамсалтай санагддаг.
-Google, Apple зэрэг дэлхийн томоохон компаниудын оффисийн интерьер илүү чөлөөтэй, амралтын тал руу хэвийж байна. Манайд ийм байдлаар интерьерээ хийлгэж байгаа албан байгууллага хэр олон байна вэ?
-Оффис гэхээр л цагаан өнгийн, баригдмал орчинтой байх албагүй гэсэн чиг хандлага руу дэлхий нийтээр явж байна. Google, Apple зэрэг томоохон компаниудын оффис яг л хүүхдийн парк, тоглоомын төв шиг байдаг. Энэ нь залуучуудын ажлын бүтээмжийг нэмэгдүүлэх, сэтгэлгээг нь хөгжүүлэх, чөлөөт орчин бүрдүүлэх зорилго агуулж буй. Ийм орчинд ажилласан хүнээс уран бүтээлч чанар гарч, шинэ санаа төрөх, үр дүн гаргах, бүтээмж нэмэгдэх сайн талтай гэж удирдагчид, удирдлагууд үзэх болсон. Монгол компаниуд ч аль болох тод өнгөний шийдлийг эрхэмлэж, тухайн компанийн брэндингтэй тааруулан албан газраа тохижуулж байгаа.
- “ГэрБридж” компани барилгын материалын худалдаа, үйлчилгээ үзүүлж, тавилга үйлдвэрлэдэг гэсэн. Энэ талаараа мэдээлэхгүй юү?
-Үндсэн компани маань оффисийн дотор интерьер засал хийдэг. Үүнээс гадна төмөр хийцлэлийн болон тавилгын үйлдвэртэй. Тавилгын үйлдвэр маань захиалга авдаггүй. Зөвхөн дотоод хэрэгцээнд зориулан тавилга үйлдвэрлэдэг. Мөн АНУ-аас Shaw брэндийн хивс, дрож оруулж ирж байна. Тус брэндийн хивс, дрожийг манайх худалдан авч, интерьер заслынхаа ажлыг гүйцэтгэдэг байсан. Shaw-аас бидэнд санал тавьсны дагуу албан ёсны төлөөлөгч нь болж, 2017 онд хамтын ажиллагааны гэрээ байгуулсан. Shaw бол дэлхийн хивс, дрож үйлдвэрлэлийн 60 хувийг эзэлдэг том брэнд. Ерөнхий захирал нь дэлхийн номер нэг тэрбумтан Уоррен Баффетт. Ажлын шугамаар тэр мундаг хүнтэй тааралдаж байлаа. Ингэхэд түүнтэй уулзсан анхны монгол хүн болсон шүү. Shaw индастри группийн хивс, дрож нь 100 хувь эко буюу хүний биед ямар ч сөрөг нөлөөгүй, ус чийгний хамгаалалттай, цахилгаанждаггүй гэх мэт олон давуу талтай. Ашиглалтын хугацаа нь насан туршийн баталгаатай. Бид үйлдвэрээс гарахад нь таван жилийн баталгаа өгдөг. Хивс, дрожийн өнгө дизайны хувьд дахин давтагдашгүй. Нэг коллекцид 6000 төрөл бий. Манайд 1000 гаруй загварын сонголтууд байгаа. Тэгэхээр ижил төстэй үйл ажиллагаа явуулдаг интерьерийн компанитай давхцана гэсэн асуудал үүсэхгүй. Үнэ өртөгийн хувьд боломжийн. Дэлхийн нэр хүндтэй Nike, Coca Cola, Shangri-La зэрэг компаниуд Shaw-ийг сонгодог.
-Мөн Parador брэндийн паркетин шалны албан ёсны төлөөлөгч юм байна. Энэ шалны давуу тал юу вэ?
-Германы Коэсфэлд тосгонд Parador-ийн том үйлдвэр байдаг. Германы 49 хувийг дангаар эзэлдэг. Ганц паркетэн шал бус мод модон хийцлэл, бэлдэц, бүтээгдэхүүн үйлдвэрлэдэг томоохон үйлдвэр. Дэлхийн нэр алдартай дизайнерууд энэ үйлдвэрт бүтээлээ гаргадаг. Заха Хадид, Карим Рашид зэрэг дизайнерүүд ажилладаг байсан. Өөрсдөө мод тарьж, тэндээсээ түүхий эдээ гаргадаг. Үржүүлгийн газар нь Австрид байдаг. Паркетан шал, ламинат үйлдвэрлэлийн том төлөөлөгч бол Parador. Монголд АСЕМ, Голомт, Рома инвест зэрэг компаниудын шал, тавилгыг хийсэн. 2012 онд албан ёсны төлөөлөгч болох гэрээ байгуулсан. Манай компани Parador-той урт хугацааны гэрээтэй ажиллаж байна. Parador-т хоёр төрлийн шал байдаг. Паркет нь инженерийн модон шал. Энэ нь цэвэр модноос гаргасан, түүхий эсвэл дахин боловсруулж өнгөлгөө хийсэн шал. Харин ламинатан шал нь шахмал хатуулгатай мод гэсэн үг. Цавуу, бүрэгч зэрэг материал ордог. Гэхдээ хүний биед хоргүй, гаж нөлөө үзүүүлэхгүй гэдгээрээ онцлог. Хятадын ламинатан шалнаас байнгын хорт бодис ялгардаг. Энд л гол ялгаа, чанар нь оршиж байгаа юм. Мөн Parador-ийн өнгө, загвар нь үргэлж солигддог. 2015 оны загвар 2018 онд байхгүй бас гарахгүй гэсэн үг. Тиймээс бусад паркетан шал үйлдвэрлэдэг компаниуд Parador-ийн чиг хандлагыг дагаж явдаг.
-Танай компанийн ойрын болон хэтийн зорилго юу вэ?
- “Танай компани яагаад барилга барьдаггүй юм бэ” гэж хүмүүс их асуудаг. Манайх энэ чиглэлийн компани биш шүү дээ. Тиймээс бидний хувьд салбартаа дэлхийн стандартыг барьж ажиллахыг чухалчилж байна. Манай компани хэтдээ барилга болон материал үйлдвэрлэлийн худалдааны нэгдсэн томоохон цэг байгуулахаар төлөвлөж байгаа. Зураг төслөө захиалсан байна. Одоо хөрөнгө оруулалтын шатандаа яригдаж байна. Мөн бид үндэсний стиль, загвар бүхий бүтээгдэхүүнийг АНУ-ын Нью Йорк хотын “Павилон центр”-т борлуулах сонирхолтой байгаа. Бэлтгэл ажил хангагдсан. Урлангийн системээр явна. Үндэсний загвартай, арт маягийн хананы хийцлэлүүдийг үйлдвэрлэж, борлуулахаар зэхэж байгаа юм.
-Ярилцсанд баярлалаа. Та бүхэнд ажлын өндөр амжилт хүсье.
 
Ярилцсан: Б.Бямбасүрэн