Барилга МН сэтгүүл

  III улирлын сэтгүүл захиалгын хугацаа үргэлжлэн буй энэ үед “Барилга.МН” сэтгүүлийн 7-р сарын шинэ дугаар уншигч та бүхний гарт хүрч байна.

  Урин дулааны улиралд барилгын ажил эрчимтэй явагдаж буй хугацаанд барилгын салбарт удирдах түвшний ажил эрхэлж буй эрхмүүд, инженер техникийн ажилтнууд, барилгачид, үл хөдлөх хөрөнгө болон орон сууцны төсөл хэрэгжүүлэгчид, шинэ орон сууц авахаар төлөвлөж буй иргэд, амины орон сууцаа өөрсдөө барихаар зэхсэн уншигч та бүхэндээ зориулан хэрэгцээт гол мэдээллүүдийг нь хүргэхээр зорилоо.



  Юун түрүүнд барилгын салбарын аж ахуйн нэгж, үйлдвэрлэгч, бизнес эрхлэгчдийнхээ дуу хоолой болж, тэднийг бүтээн байгуулалтын их үйлсэд хүчээ нэгтгэн ажиллахыг уриалж, өөрийн хувь нэмрийг оруулж яваа “БҮТИ” ХХК-ийн Ерөнхий захирал Г.Батжаргалын ярилцлага та бүхний сонирхлыг ихээхэн татах болов уу. Дугаарын зочин булан дахь түүний ярилцлагаас барилгын салбарт хийж хэрэгжүүлж болох шинэлэг санал санаачилгуудаас нь сонирхон уншаарай.



  Сарын гол сэдэв-Барилгын салбарын гол хэрэглээ “талх” нь болсон цементийн үнэ ханш богино хугацаанд яагаад хэлбэлзэж тэнгэрт хадсан, үнэ болон нөөцийн тогтвортой байдлыг хангахад ямар арга хэмжээ авч болох тухай “Цементийн ханган нийлүүлэлтийн тогтолцоо бидэнд хэрэгтэй” нийтлэлд хөндөн бичлээ.

  Мэдээж Дурсгалт барилга, Экспертийн зөвлөгөө, Мэргэжлийн зөвлөмжүүд, Архитектур ба интерьерийн шинэлэг шийдлүүдийг сар бүр уламжлал болгон цувралаар хүргэж байгаа билээ.



  Энэ удаагийн Хэрэглэгчийн булангаас гэр хороолол болон зусландаа хэрэгжүүлж болох Бохирны септик системийн тухай зөвлөмжийг авах боломжтой. Түүнчлэн Барилгачин нэг цэгийн үйлчилгээгээр дамжин иргэдэд хүргэж буй 40 м.кв талбайтай, 18 сая төгрөгийн өртөг бүхий угсардаг байшингийн зөвлөмжийг аваарай. Энэхүү амины орон сууцыг амралт, сувиллын газарт, зуслангийн хашаандаа зөөгөөд угсрахад хялбар тул олон зориулалтаар ашиглаж болно.


 
  Хуулийн буланд барилгын салбарт түгээмэл тохиолддог хэд хэдэн төрлийн асуудал, тэр дундаа ажил гүйцэтгэлийн гэрээнээс үүдсэн маргаан, ажил олгогч ажилтан хоёрын хооронд үүсдэг зөрчил, хөдөлмөрийн маргаан, тэдгээрийг хэрхэн шийдэж, юунд анхаарах ёстой талаар өмгөөллийн компанийн ажилтантай хийсэн ярилцлагыг хүргэж байна.



  Монголчууд бидэнтэй угсаа гарвал нэг, өмнийн орноор зорчиж хөгжил цэцэглэлттэй нь танилцаж, туршлага судалсан сэтгүүлчийн аяллын тэмдэглэлээс нэгийг бодож, хоёрыг тунгаах бүтээн байгуулалтын олон шинэлэг санаа туршлагаас хуваалцаарай.



  Эцэст нь хуучин байраа сольж, шинэ байр авахаар хайж буй, барилгын материалаа аваад өөрсдөө байшин барих гэж буй хэн бүхэнд зориулан Барилгачин нэг цэгийн үйлчилгээн дэх онцлох бүтээгдэхүүн, “Шинэ орон сууцны үнэ ханш”, “Барилгын материалын үнэ ханш”, “Ажил гүйцэтгэлийн үнэлгээ” зэрэг мэдээллийг шинэчлэн бэлтгэлээ.



Сэтгүүлийн шинэ дугаарыг захиалах, эсвэл худалдан авахыг хүсвэл...